निखिल वागळेजी खा. उदयनराजेंची सरंजामी संज्ञांची मात्रा मिस्टर रामराजेंना लागू होईल काय ?

2018-01-08

निखिल वागळेजी खा. उदयनराजेंची सरंजामी संज्ञांची मात्रा मिस्टर रामराजेंना लागू होईल काय ?

 "सध्या भीमा कोरेगाव  या एकच विषयावरुन राज्यात रणकंदन माजले आहे. कधी नव्हे अशी जातीय घुसळण आणि धर्मांधता राज्यात दिसून येतेय. या घटनेमुळे राज्यातील सामाजिक भाईचारा कलुषित झाला आहे. हे नेमकं काय प्रकरण आहे, हे जो-तो आपापल्या पद्धतीने मांडत आहे. त्यामुळे ही लागलेली आग शमण्यापेक्षा ती अधिक तीव्र होत चालली आहे. पुरोगामी समजल्या जाणार्‍या महाराष्ट्रात हा जातीय आगडोंब कसा विझणार? त्यापेक्षा तो अधिक धगधगेल कसा, याकडेच काही माध्यमे आपला टीआरपी वाढविण्यासाठी नको त्या वेळी, नको त्या विषयावर घसरताना दिसून येत आहेत.

 परवा भिमा कोरेगाव घटनेनंतर सातार्‍याचे खासदार उदयनराजे यांची या विषयावर एका वृत्तवाहिनीने प्रतिक्रिया घेण्यासाठी अती घाई केली होती. टीआरपीच्या नादात आपण काय दाखवतोय, याचे भान संबंधितांना ठेवता येत नाही. खा. उदयनराजे म्हणजे मोकळाढाकळा माणूस. जे पोटात तेच ओठावर. परंतू खा. उदयनराजेंच्या 35 टक्के या एका शब्दाने घात केला आणि उदयनराजेद्वेषींना हे आयते कोलित हातात मिळाले. यानंतर ज्येष्ठ पत्रकार निखील वागळे यांनी उदयनराजेंच्या 35 टक्के या विधानाचा खरपूस समाचार घेत उदयनराजेंना आजपासून व आत्तापासून मी छत्रपती खासदार उदयनराजे म्हणणार नाही, त्यांना फक्त खा. उदयन भोसले म्हणणार, असे जाहीर करुन टाकले.

 यासाठी आता थोडे पाठिमागे जावूया.....
सुमारे पाच ते सहा वर्षापूर्वी निखील वागळे आयबीएन लोकमत या मराठी वृत्तवाहिनीचे संपादक होते. त्यावेळी त्या वृत्तवाहिनीचा टीआरपीही जोरात होता. त्यामुळे वागळेही जोमात होते. स्टुडिओमध्ये बोलावून दिसेल त्याला कसा वाकडा करुन त्याचा आकडा कसा करायचा, हा हातखंडा वागळेंनी चांगलाच आत्मसात केला होता. त्यामुळे राज्यातील भले-भले वागळेंना टरकून असत. दरम्यान त्याचवेळी वागळेंचे निकटवर्तीय पत्रकार युवराज मोहिते यांनी मराठी वृत्तपत्रसृष्टिमध्ये कलमनामा हे ब्रेकिंग न्यूजच्या जमान्यातील विश्‍वसनीय साप्ताहिक सुरु केले होते. 
कुठलेही साप्ताहिक अथवा दैनिक समाजमनात रुजविण्यासाठी त्याला काहीतरी प्लॅटफॉर्म हवा असतो. अखेर तो प्लॅटफॉर्म खा. उदयनराजेंच्या निमित्ताने साप्ताहिक कलमनामा ला मिळाला होता. प्रतापगड येथील भवानी देवी संस्थानची हजारो एकर जमीन महाबळेश्‍वर, वाई आणि जावली तालुक्यात आहे. ही जमीन शेकडो वर्षांपासून येथील स्थानिक भूमिपूत्र कसत आहे. ही जमीन कसणार्‍या शेतकर्‍यांना खंडकरी म्हणून ओळखले जाते.

 ही सरंजामी जमीन कसून शेकडो वर्षापासून हे लोक आपला उदरनिर्वाह करीत आहेत. असे असतानासुद्धा तो शेतकरी या जमिनीचा मालक ठरु शकत नाही. कारण जमिनीच्या सातबारामध्ये असणार्‍या इतर हक्कामध्ये प्रतापगड येथील भवानी देवी संस्थान व खा. उदयनराजे भोसले यांचे नाव आहे. त्यामुळे संबंधित खंडकरी ती जमीन विकू अथवा त्या जमिनीवर कर्ज काढू शकत नाही. हाच मुद्दा धरुन शिवसेना पुरस्कृत वसईचे तत्कालीन आमदार विवेक पंडित यांनी या विषयावरुन विधानसभा गाजवून राज्यभर हे रान पेटवले होते. 
हे पेटवलेले लोण सातार्‍यातही आले होते. कलमनामा आणि इंग्रजी साप्ताहिक आऊटलुक (मॅगझीन) यांनी हा विषय उचलून धरलेला होता. कलमनामा हे साप्ताहिक या विषयामुळे राज्यभरात चांगलेच बाळसे धरु लागले होते. त्यावेळी उदयनराजे या सर्व प्रकारामुळे एकटे पडलेले होते. स्वपक्षीय ही थारा देताना दिसून येत नव्हते. मुंबईतील आझाद मैदानापासून सातारच्या जिल्हाधिकारी कार्यालयापर्यंत उदयनराजे विरोधी मोर्चाने रान तापवले गेले होते. 

त्यावेळी चर्चेसाठी वागळेंनी तत्कालीन आमदार विवेक पंडित, कलमनामाचे संपादक युवराज मोहिते यांना स्टुडिओमध्ये चर्चेसाठी बोलावले होते. ही चर्चा कदाचित महाराष्ट्राच्या इतिहासामध्ये नोंदविली गेली असेल. कारण त्या चर्चेमध्ये थेट सातारच्या छत्रपतींच्या थोरल्या गादीवरच हल्ला चढविण्यात आला होता. 14 आणि 15 ऑगस्ट 1947 रोजी भारत आणि पाकिस्तान या दोन्ही देशातील सर्व शाह्या, राजे-रजवाडे, संस्थाने खालसा करण्यात आली. पाकिस्तानचे माहित नाही. परंतू स्वतंत्र भारतामध्ये संस्थानिक, राजे-रजवाडे हे सामान्य माणसाप्रमाणे जीवन जगतील अशी आशा बाळगण्यात आली. परंतू संस्थानिक, राजे-रजवाडे चतुर निघाले. सुंभ जळेल, पण पीळ सुटणार नाही अशा पद्धतीने या संस्थानिक, राजे-रजवाड्यांनी आपला वकुब तसाच ठेवला.

 महाराष्ट्राचे थोर सुपुत्र स्व. यशवंतराव चव्हाण यांनी या राजे-रजवाडे, संस्थानिकांना राजकारणात कधीही येवू दिले नाही. बहुजन समाजातील अनेक कर्तबगार मुले मात्र त्यांनी राजकारणात आणून त्यांना आमदार, खासदार, मंत्री केले. प्रसंगी सातारा छत्रपतींच्या गादीच्या राजमाता सुमित्राराजे यांच्याही उमेदवारीला त्यांनी कडाडून विरोध केला. फलटणमध्ये तत्कालीन फलटण संस्थानचे अधिपती मालोजीराजे नाईक-निंबाळकर यांचा स्व. कॉ. हरिभाऊ निंबाळकर यांनी लाजिरवाणा पराभव केला. त्यानंतर माजी आमदार कृष्णचंद्र भोईटे, माजी आमदार स्व. चिमणराव कदम यांनी या फलटणच्या राजांना सुमारे साडेतीन दशके फलटणकडे फिरकूही दिले नाही. परंतू फलटणमधील काही राजधार्जिन्या लोकांनी ही 'ब्याद' 1991 साली फलटणच्या राजकारणात आणली आणि ही 'ब्याद' 1991 पासून आजतागायत फलटणकरांच्या मानगुटीवर बसून सरंजामशाही ही चीज काय असते, याची पदोपदी जाणीव फलटणकरांना करुन देत आहे.

 ज्या यशवंतराव चव्हाणांनी सत्तेचे विकेंद्रीकरण करायला लावले, त्या यशवंतराव चव्हाण व त्यांची धर्मपत्नी वेणुताई चव्हाण यांचा महाराष्ट्रातील पहिला संयुक्त पुतळा फलटण येथील जिंती नाक्यावर आहे. यशवंतप्रेमींमध्ये स्फुल्लिंग चेतवणारा हा पुतळा फलटणच्या राजे लोकांनी अक्षरश: अडगळीमध्ये टाकला आहे. याठिकाणी फिरस्ती कुत्री, डुकरे, गाढवे बिनदिक्कतपणे वावरताना दिसत आहेत. मात्र असे असतानाही यशवंतराव चव्हाण यांच्या जन्मशताब्दी दिवसादिवशीसुद्धा या राजे लोकांनी या पुतळ्याला साधे हार घालण्याचे धारिष्ट्य दाखविले नाही. त्यामुळे 'बदला' काय चीज असते, याचे उत्तम उदाहरण फलटणच्या राजे लोकांनी या माध्यमातून दाखवून दिले. शरद पवारांच्या राष्ट्रवादी पक्षात राहून फलटणची सत्ता उपभोगणारे फलटण नरेश मिस्टर रामराजे नाईक-निंबाळकर यांचा तोंडी लावण्यापुरते यशवंत प्रेम काय कामाचे?

ज्येष्ठ सनदी अधिकारी आणि पुण्यात कृषी आयुक्त पदावर कार्यरत असणारे तत्कालीन अधिकारी सुनिल केंद्रेकर यांनी पत्रव्यवहार, संचिका आणि मोबाईल मॅसेजमध्ये नावाच्या अगोदर सर, माननीय, साहेब, श्री अशा विशेष व सरंजामशाहीला प्रोत्साहन देणार्‍या संज्ञा वापरण्यात येवू नयेत, असे परिपत्रक काढून राज्यातील राजे-रजवाडे व संस्थानिकांचे थोबाड फोडले होते. सुनिल केंद्रेकर यांच्या या भूमिकेचे राज्यभरात कौतुक झाले होते. परंतू लुटूपुटूची लढाई सुद्धा हरणार्‍या महाराष्ट्रातील संस्थानिकांनी सुनिल केंद्रेकरांचा कोणताही आदर्श न घेता आपले घोडे पुढे दामटलेच आहे. सातारा जिल्ह्याचा विचार केल्यास फलटण, औंध संस्थानामध्ये लोकांना मुजरा घालण्यासाठी सक्ती केली जाते. जो मुजरा घालत नाही, त्याला त्याच्या ऐपतीप्रमाणे त्याची जागा दाखविली जाते.

ज्येष्ठ पत्रकार निखील वागळेंनी सरंजामशाही संज्ञांविरोधात उपस्थित केलेला मुद्दा रास्त आहे. सातार्‍यातील जिल्हाधिकारी कार्यालयासमोर माजी आमदार विवेक पंडीत यांनी खा. उदयनराजे यांच्या विरोधात काढलेल्या मोर्चात खा. उदयनराजे स्वत: सहभागी झाले. त्यावेळी त्यांनी मला उदयनराजे.. म्हणा, उदयन.. म्हणा किंवा उद्या.. म्हणा असे म्हणत मी सामान्य लोकांमध्ये वाढलो आहे, त्यामुळे या विशेष संज्ञांनी मला काही फरक पडत नाही. त्यामुळे मी लोकांच्या मनातील राजा आहे. त्यामुळे मला लोकांच्या मनातून कोणीही काढू शकत नाही, असे आव्हान केले होते. उदयनराजेंच्या या पवित्र्यामुळे त्यावेळी आंदोलकच उदयनराजेंच्या प्रेमात पडले होते.

राज्यातील वरिष्ठ सभागृह समजल्या जाणार्‍या विधानपरिषदेचे सभापती मिस्टर रामराजे नाईक-निंबाळकर हे फलटण संस्थानचे अधिपती समजले जातात. वंशपरंपरागत चालून आलेली राजेपदाची माळ त्यांच्या गळ्यात पडलेली आहे. राज्यात उच्च विद्याविभुषीत, सुसंस्कृत, अशी मिस्टर रामराजेंची ओळख आहे. राष्ट्रवादी सुप्रिमो शरद पवार यांचा सर्वात लाडावलेला कार्यकर्ता म्हणून मिस्टर रामराजेंकडे बघितले जाते. परंतू राज्याला परिचित असणारा हा चेहरा फलटणमध्ये मात्र वेगळाच आहे. हे निखिल वागळेंना आजपर्यंत दिसले नाही. फलटणमध्ये सरंजामी वकुब काय असतो, हे अनुभवण्यासाठी निखिल वागळे यांनी वेषांतर करुन फलटणमध्ये काही दिवस राहिल्यानंतर त्यांच्या ते लक्षात येईलच. त्यामुळे सरंजाम संज्ञांची मात्रा खा. उदयनराजेंपुरती लागू न राहता ती मात्रा मिस्टर रामराजेंनाही लागू होईल काय? याचा अभ्यास निखिल वागळेंनी जरुर करावा व ज्याप्रमाणे खा. उदयनराजे आ. पंडितांबरोबर वागले त्या पद्धतीने फलटण नरेश तुमच्याशी  वागतील काय? हे बघणे महाराष्ट्रातील जनतेसाठी औत्सुक्याचे ठरेल. त्यामुळे निखील वागळेजी "क्या रखा है, मुंबई और दिल्ली में कुछ दिन तो गुजारिए फलटण में !"
 

- संग्राम निकाळजे

 


Social Sharing




आपली प्रतिक्रिया
प्रतिक्रिया

महत्वाच्या बातम्या

माहिती व जनसंपर्क महासंचालनालयाच्यावतीने जानेवारी 2018 चा लोकराज्य अंक स्मार्ट, समर्थ, संवेदनशील ‘आपले पोलीस आपली अस्मिता’ हा पोलीस विभागाच्या कार्यपद्धतीवर प्रकाशित करण्यात आला आहे. या लोकराज्य विशेषांकाचे प्रकाशन पोलीस अधीक्षक संदीप पाटील यांच्या हस्ते आज करण्यात आले.

नुकताच प्रदर्शित झालेल्या बारायण चित्रपटात संभाजीराजेंच्या गंभीर प्रसंगाचे भावनिक भांडवल करत राजेशिर्के घराण्याची बदनामी केली आहे. दिग्दर्शक व निर्मात्यांनी केलेला हा खोडसाळपण संतापजनक व निषेधार्ह असून या चित्रपटावर शासनाने बंदी घालावी, अन्यथा आम्हाला न्यायालयात जावे लागेल असा इशारा सुहास आबासाहेब राजेशिर्के यांनी एका प्रसिध्दी पत्रकाव्दारे दिला आहे.

राष्ट्रीय विधी सेवा प्राधिकरण, दिल्ली यांच्या निर्देशानुसार सातारा जिल्हा विधी सेवा प्राधिकरणातर्फे 21 जानेवारी रोजी दुपारी 12 ते 4 या वेळेत कराड येथील न्यायालयाच्या आवारात कायदेविषयक महाशिबीराचे आयोजन करण्यात आले आहे, अशी माहिती जिल्हा विधी सेवा प्राधिकरणाच्या सदस्य सचिव वर्षा पारगावकर यांनी दिली आहे.

बांधकाम केलेल्या घराची नोंद करून उतारा देण्यासाठी व वीज कनेक्शनसाठी ना हरकत दाखला देण्यासाठी 1 हजार 500 रूपयांची लाच स्विकारताना अंबवडे बुद्रक, ता. साताराच्या ग्रामसेवक सचिन भरतराव गायकवाड (वय 37) याला लाचलुपत प्रतिबंधक विभागाने रंगेहाथ पकडले.

सातारा लिक्स बातम्या

.
" नैसर्गिक वरदान लाभलेले सातारा हे सात डोंगरांच्या कुशीत दडलेले महाराष्ट्रातील एक टुमदार शहर. याला धड शहरही म्हणता येत नाही, आणि खेडही. शिवछत्रपती व भारतरत्न डॉ. बाबासाहेब आंबेडकर यांच्या पदस्पर्शाने पावन झालेली ही भूमी. छत्रपतींची राजधानी म्हणून लौकिक पावलेली, एकेकाळचा सहकार चळवळीचा बालेकिल्ला असलेली ही भूमी आता मॅरेथॉनचे गाव म्हणून जगभरात ओळखले जावू लागले आहे. सातारकर आरोग्याच्या दृष्टीने किती सजग झाले आहेत.याची प्रचीती साताऱ्यात आल्यावर आपल्याला येईलच.

.
"देशात आणि राज्यामध्ये चित्रपटांना पुन्हा एकदा चांगले दिवस येवू लागले आहेत. नव्वदच्या दशकात इडियट बॉक्सच्या बंधात अडकलेल्या लोकांना आता आशयघन विषय बघायला पुन्हा एकदा आवडू लागल्यामुळे चित्रपटगृहांपासून दुरावलेला रसिक मायबाप पुन्हा एकदा चित्रपटगृहांकडे आकर्षित होवू लागला आहे. देशभरात विविध राज्यांमध्ये मोठ्या प्रमाणावर राष्ट्रीय व आंतरराष्ट्रीय फिल्म फेस्टिव्हलचे आयोजन केले जाते. हे लोण आता जिल्हा व तालुकापातळीवरही उतरले आहे.


.
सातारा जिल्हा हा सैनिक जिल्हा म्हणून ओळखला जातो. स्वराज्यासाठी रक्त सांडण्याचा आणि देशेच्या सेवेचा इतिहास इथल्या मातीतला डि.एन.ए आहे. हा जिल्हा शैक्षणिक प्रगतीत नवनवे उच्चांक स्थापित करतो आहे. हा धडपडणारी गुण प्रत्येक क्षेत्रात दिसतो. त्याला शिक्षण क्षेत्रही अपवाद नाही. प्राथमिक शिक्षणात ज्या झपाट्याने जिल्ह्याची प्रगती होत आहे. ती उल्लेखनीय अशीच आहे. आता हा प्रगत शैक्षणिक महाराष्ट्र कार्यक्रमांतर्गत आतापर्यंत सातारा जिल्ह्यात जिल्हा परिषद शाळांची कामगिरी अतिशय कौतुकास्पद आहे. सातारा जिल्ह्यातील खटाव तालुक्यातील विखळे, खंडाळा तालुक्यातील शिरवळ, कोरेगाव तालुक्यातील ल्हासुर्णे, पाटण तालुक्यातील तारळे(मुळी), वाई तालुक्यातील निकमवाडी, जावळी तालुक्यातील ओझरे या जिल्हा परिषद शाळांनी अतिशय चमकदार शैक्षणिक प्रगती केली आहे. मात्र सातारा तालुक्यातील अपशिंगे (मिलीटरी) जिल्हा परिषद शाळेने मात्र गुणवत्तापूर्ण शिक्षणाबरोबर खेळ आणि स्पर्धा परीक्षेतही धवल यश संपादन केले आहे. वर उल्लेख केलेल्या सर्व शाळाही प्रगत शाळा, डिजीटल शाळा आयएसओ मानांकन प्राप्त आहेत.

.
महाबळेश्वरची ओळख थंड हवेच ठिकाण म्हणून १८ व्या शतकापासून झाली... देशातील सर्वाधिक पर्जन्यमान असलेल्या क्षेत्रामध्ये हे दुसऱ्या क्रमांकाचे सह्याद्रीच्या डोंगर रांगातील गिरीवन शहर .... या शहरापासून जवळच असलेल पाचगणी हेही असच सुंदर आणि टुमदार शहर ... अशा या दोन जगप्रसिद्ध शहराच्या मध्ये भिलार हे गाव वसलेल आहे. या गावाची गेल्या काही वर्षापासून स्ट्रॉबेरी पिकविणारे गाव म्हणून ओळख झालेली आहे. इथल्या प्रत्येक शेतकऱ्यांच्या शेतात हिवाळ्यात हे श्रीमंत पिक घेतल जात... दिवसेंदिवस या भागात देशभरातून आणि जगभरातून पर्यटकांचा ओढा वाढतो आहे. त्या पर्यटकांना महाराष्ट्र कळावा म्हणून महाराष्ट्र शासनाने या वर्षी पासून या गावाला पुस्तकाच गाव म्हणून नवी ओळख दिली. ती ओळख खुप गडद झाली असून हजारो पर्यटक या गावाकडे आकर्षित होत आहेत. नेमके हे पुस्तकाचे गाव ही काय संकल्पना हे समजावून घेण्यासाठी या गावाची प्रत्यक्ष भेट घेवून साधलेला हा संवाद ...... !!


Careers

Advertise with us

Privacy policy
Copyright     TODAY MEDIA NETWORK ,  All rights reserved.