कासची काळजी घ्याच; पण सातार्‍यातील प्रदूषणही पहा !

2017-09-25

कासची काळजी घ्याच; पण सातार्‍यातील प्रदूषणही पहा !

सातारा(गजानन चेणगे) : युनेस्कोने जागतिक वारसा स्थळाचा दर्जा दिल्यामुळे सातारा शहराजवळचे कास पुष्पपठार जगाच्या नकाशावर आले. कासचे पुष्पवैभव पाहण्यासाठी जगातून पर्यटक येत असतात. कासचे हे महत्व लक्षात घेऊन प्रदूषण नियंत्रण मंडळाने कासच्या पर्यावरणाचे रक्षण करण्यासाठी विशेष लक्ष घातले आहे. ही बाब स्वागतार्हच असली तरी, देशविदेशातील पर्यटकांना कासला ज्या सातारा शहरातून जावे लागते, त्या सातार्‍यातील प्रदूषणाकडे प्रदूषण नियंत्रण मंडळाचे लक्ष दिसत नाही. त्यामुळे ’कासचे पहाच, पण खाली जरा सातार्‍यातही पहा’ असे म्हणण्याची वेळ सातारकरांवर आली आहे.
सातार्‍यातून कास पुष्पपठार जेमतेम 22 किलोमीटर आहे. सातारा शहरातूनच सुरू होणार्‍या यवतेश्वरच्या घाटातून कासचा रस्ता आहे. कासचे पुष्पवैभव त्या ठिकाणी अनादी काळापासून आहे. मात्र गेल्या काही वर्षात त्याचा खूपच बोलबाला झाल्याने येथे पर्यटकांचा ओघ सुरू झाला. त्यात युनेस्कोने कासला जागतिक वारसा स्थळाचा दर्जा दिल्यापासून दरवर्षी देशविदेशातील लाखो पर्यटक कासला भेट देत असतात. त्यामुळे कास परिसरात व मार्गावर हॉटेल व्यवसायही बहरला आहे. त्यांच्या सांडपाण्याच्या विल्हेवाटीचा प्रश्‍न आहे. त्या सांडपाण्यामुळे भविष्यात कासच्या सौंदर्याला बाधा पोहोचू शकते अशी भीती पर्यावरणवाद्यांना वाटते. या भीतीची दखल प्रदूषण नियंत्रण मंडळाने घेतली असून संबंधितांना यासंबंधी नोटीसा बजावल्या आहेत.
प्रदूषणमुक्त काससाठी प्रदूषण नियंत्रण मंडळाची ही भूमिका स्वागतार्हच आहे. कासच्या बाबतीत इतक्या संवेदनशील व हळव्या झालेल्या प्रदूषण नियंत्रण मंडळाने कासच्या पायथ्याशी असलेल्या सातार्‍यातील प्रदूषणाकडेही त्याच भूमिकेतून पाहण्याची अपेक्षा आहे. पण तितकी संवेदनशीलता दिसत नाही. कासला सातार्‍यातूनच जावे लागते. मग ’कास झकास अन सातार्‍यात भकास’ असे चित्र चांगले दिसते का याचा विचार करण्याची गरज आहे. छत्रपतींची राजधानी राहिलेल्या सातारा शहराबाबत पर्यटकांमध्ये प्रचंड औत्सुक्य असते. पण येथे आल्यावर व येथील परिस्थिती पाहिल्यावर पर्यटकांमध्ये सातार्‍याविषयी काय भावना निर्माण होईल याचाही संवेदनशील प्रदूषण नियंत्रण मंडळाने अभ्यास करायला हरकत नाही.
सातार्‍यात घराघरातील कचर्‍याच्या विल्हेवाटीसाठी नगरपालिकेच्या घंटागाड्या फिरत असतात. तरीही रस्त्यावरील कचराकुंड्या ओसंडून वाहतानाचे दृश्य पहायला मिळते. पण त्यापेक्षा शहरातील वैद्यकीय कचर्‍याचा प्रश्‍न अतिशय गंभीर आहे. गेल्या दशकभरात शहरात अनेक स्पेशालिटी, सुपर स्पेशालिटी रूग्णालयांचा तसेच लॅबचा पसारा वाढला आहे. अद्ययावत वैद्यकीय सुविधा उपलब्ध होत आहेत. त्यामुळे सातारा हे मेडिकल हब होत आहे. या असंख्य रूग्णालयांच्या वैद्यकीय कचर्‍याच्या प्रश्‍नाकडे प्रदूषण नियंत्रण मंडळाने अतिशय गांभिर्याने पाहण्याची गरज आहे. 
वैद्यकीय कचर्‍यात विविध औषधे, त्यांची रॅपर्स, सुया, शस्त्रक्रिया करून मानवी शरीरातून काढलेला भाग, रक्त, रक्ताने माखलेला काप्ाूस, कपडे आदिंचा समावेश होतो. हा कचरा रूग्णालयाच्या व्यवस्थापनाने रस्त्यावर, ओढ्यात अशा ठिकाणी टाकायचा नाही. उघड्यावर टाकल्यास त्यातून अनेक धोके उद्भवण्याची शक्यता असते. मोकाट जनावरांनी त्यातील काही खाल्यास त्यातून अनेक समस्या निर्माण होऊ शकतात. ओढ्यात टाकल्यास या गोष्टी प्रवाहाबरोबर वाहत जावून नदीत मिसळतील. पाणी योजनांमधून हे पाणी लोकांपर्यंत येईल. हे आरोग्याच्या दृष्टीने अत्यंत अपायकारक आहे. वैद्यकीय कचरा टाकलेले पाणी जमिनीत मुरल्यास कूपनलिकेतून ते आरोग्याला हानी पोहोचवेल. या गोष्टी रोगराईला निमंत्रण देणार्‍या आहेत. म्हणून वैद्यकीय कचर्‍याची साठवणूक व विल्हेवाट शास्त्रोक्त पध्दतीने झालीच पाहिजे.
वैद्यकीय कचर्‍याची विल्हेवाट लावण्याच्या संदर्भात कायदे पुरेसे सुस्पष्ट आहेत. त्यामध्ये यासंदर्भात कशी दक्षता घ्यायची याच्या तरतुदी, मार्गदर्शक सूचना आहेत. प्रदूषण नियंत्रण मंडळाने प्राधिकृत केलेल्या एजन्सीचे सदस्यत्व वैद्यकीय व्यावसायिकांनी घेतले पाहिजे. दररोजचा वैद्यकीय कचरा त्या एजन्सीने दिलेल्या बॅगमध्ये एकत्रित साठवला पाहिजे व त्या एजन्सीची गाडी आल्यानंतर त्यांच्याकडे तो सुपुर्द केला पाहिजे. याबाबतीत नेमके काय घडते याचा तपास घेण्याची गरज आहे. शहरात विविध रूग्णालयांच्या परिसरात शोध घेतल्यास वैद्यकीय कचरा रस्त्यात उघड्यावर तसेच शहरातून वाहणार्‍या विविध ओढ्यात टाकल्याचे भयावह चित्र पहायला मिळते. यावरून या समस्येबद्दल प्रदूषण नियंत्रण मंडळ किती दक्ष आहे ते दिसून येते. शहरातील वैद्यकीय कचर्‍याच्या बाबतीतले चित्र असेच राहिल्यास सातारकरांचे आरोग्य धोक्यात येऊ शकते. त्यामुळे वेळीच सावधान होण्याची गरज आहे. म्हणूनच प्रदूषण नियंत्रण मंडळाने कासच्या पर्यावरणाची जरूर काळजी घ्यावी, नव्हे ती घेतलीच पाहिजे. त्याबाबतची त्यांची भूमिकाही चांगली आहे. पण त्याबरोबर कासच्या पायथ्याशी असलेल्या ऐतिहासिक सातार्‍याचे सौदर्य व आरोग्य जपावे अशी अपेक्षा सातारकर व्यक्त करत आहेत.

विल्हेवाट लावण्यासाठी विशिष्ट पध्दत 
          वैद्यकीय कचर्‍याची विल्हेवाट लावण्यासाठीही विशिष्ट पध्दत व यंत्रणा आहे. जाळलेल्या पदार्थांचा धूरसुध्दा वातावरणात मिसळू नये याची काळजी घ्यावी अशी कायद्यात तरतूद आहे. कारण हा धूर आरोग्याला हानीकारक असतो. हा कचरा जाळल्यानंतर त्याचा धूर पाण्यात पकडला जातो व नष्ट केला जातो.

 


Social Sharing




आपली प्रतिक्रिया
प्रतिक्रिया

महत्वाच्या बातम्या

जिल्ह्यात वाळू तस्करांची मुजोरी सुरूच असून, रविवारी पहाटे कामेरी (ता. सातारा) येथे नदीपात्रातील वाळू चोरत असताना तलाठी व सर्कल त्या ठिकाणी गेल्यानंतर संशयित दोघांनी त्यांना धक्काबुक्की, शिवीगाळ केल्याची घटना घडल्याने खळबळ उडाली आहे. दरम्यान, याप्रकरणी बोरगाव पोलिस ठाण्यात गुन्हा दाखल झाला असून, 5 ब्रास वाळूसह यारी, ट्रॅक्टर असा एकूण 3 लाख 80 हजार रुपयांचा मुद्देमाल जप्त करण्यात आला आहे.

ग्रामपंचायतीमध्ये काम करणार्‍या कर्मचार्‍यांना वेळेत वेतन मिळत नसल्याने अडी-अडचणी निर्माण झाल्या होत्या. या पार्श्‍वभूमीवर राज्याच्या ग्रामविकास विभागाने ग्रामपंचायत कर्मचार्‍यांचे वेतन ऑनलाइन पध्दतीने थेट त्यांच्या बँक खात्यात जमा करण्याचा महत्वकांक्षी निर्णय घेतला आहे. त्याचा फायदा सातारा जिल्ह्यातील सुमारे 2 हजार 622 ग्रामपंचायत कर्मचार्‍यांना झाला आहे.

मकरसंक्रांत हा सण म्हणजे एकमेकांना शुभेच्छा देण्याचा दिवस. या दिवशी माता-भगिनींच्या दागिन्यांवर डोळा ठेवणार्‍या चोरट्यांनी रात्री साडेआठ वाजता शाहूपुरी येथील महालक्ष्मी कॉलनीनजिक एका महिलेचे दागिने हिसकावून घेण्याचा प्रयत्न केला. पण त्याठिकाणी असणार्‍या युवकांनी या दोन चोरट्यांचा जिवाच्या कराराने पाठलाग केला. त्यामुळे चोरट्यांना जिवाच्या भीतीने दागिने टाकून पळ काढावा लागला. यानंतर सुमारे 20 मिनिटांने शाहूपुरी पोलीस घटनास्थळी आले. त्यांनी रस्त्यावर पडलेले दागिने हातात घेवून संबंधित महिलेकडे सुपूर्द केले. काळ आला होता, पण चोरट्यांची वेळ चुकली अन्यथा याठिकाणी तिळगुळाऐवजी युवकांकडून चोरट्यांना चांगलाच चोप बसला असता.

कोयनानगर मधील रासाटी येथील विजय धनाजी जाधव (वय ३५) याने एका महिलेला प्रेमाचे संदेश व्हॉटस् अॅपवरुन पाठवले. हे कृत्य त्याला महागात पडले. त्या महिलेने विजय विरुध्द विनयभंग केल्याची तक्रार कोयनानगर पोलिसांत केली आहे.

सातारा लिक्स बातम्या

.
" नैसर्गिक वरदान लाभलेले सातारा हे सात डोंगरांच्या कुशीत दडलेले महाराष्ट्रातील एक टुमदार शहर. याला धड शहरही म्हणता येत नाही, आणि खेडही. शिवछत्रपती व भारतरत्न डॉ. बाबासाहेब आंबेडकर यांच्या पदस्पर्शाने पावन झालेली ही भूमी. छत्रपतींची राजधानी म्हणून लौकिक पावलेली, एकेकाळचा सहकार चळवळीचा बालेकिल्ला असलेली ही भूमी आता मॅरेथॉनचे गाव म्हणून जगभरात ओळखले जावू लागले आहे. सातारकर आरोग्याच्या दृष्टीने किती सजग झाले आहेत.याची प्रचीती साताऱ्यात आल्यावर आपल्याला येईलच.

.
"देशात आणि राज्यामध्ये चित्रपटांना पुन्हा एकदा चांगले दिवस येवू लागले आहेत. नव्वदच्या दशकात इडियट बॉक्सच्या बंधात अडकलेल्या लोकांना आता आशयघन विषय बघायला पुन्हा एकदा आवडू लागल्यामुळे चित्रपटगृहांपासून दुरावलेला रसिक मायबाप पुन्हा एकदा चित्रपटगृहांकडे आकर्षित होवू लागला आहे. देशभरात विविध राज्यांमध्ये मोठ्या प्रमाणावर राष्ट्रीय व आंतरराष्ट्रीय फिल्म फेस्टिव्हलचे आयोजन केले जाते. हे लोण आता जिल्हा व तालुकापातळीवरही उतरले आहे.

.
"सध्या भीमा कोरेगाव या एकच विषयावरुन राज्यात रणकंदन माजले आहे. कधी नव्हे अशी जातीय घुसळण आणि धर्मांधता राज्यात दिसून येतेय. या घटनेमुळे राज्यातील सामाजिक भाईचारा कलुषित झाला आहे. हे नेमकं काय प्रकरण आहे, हे जो-तो आपापल्या पद्धतीने मांडत आहे. त्यामुळे ही लागलेली आग शमण्यापेक्षा ती अधिक तीव्र होत चालली आहे. पुरोगामी समजल्या जाणार्‍या महाराष्ट्रात हा जातीय आगडोंब कसा विझणार? त्यापेक्षा तो अधिक धगधगेल कसा, याकडेच काही माध्यमे आपला टीआरपी वाढविण्यासाठी नको त्या वेळी, नको त्या विषयावर घसरताना दिसून येत आहेत.

.
सातारा जिल्हा हा सैनिक जिल्हा म्हणून ओळखला जातो. स्वराज्यासाठी रक्त सांडण्याचा आणि देशेच्या सेवेचा इतिहास इथल्या मातीतला डि.एन.ए आहे. हा जिल्हा शैक्षणिक प्रगतीत नवनवे उच्चांक स्थापित करतो आहे. हा धडपडणारी गुण प्रत्येक क्षेत्रात दिसतो. त्याला शिक्षण क्षेत्रही अपवाद नाही. प्राथमिक शिक्षणात ज्या झपाट्याने जिल्ह्याची प्रगती होत आहे. ती उल्लेखनीय अशीच आहे. आता हा प्रगत शैक्षणिक महाराष्ट्र कार्यक्रमांतर्गत आतापर्यंत सातारा जिल्ह्यात जिल्हा परिषद शाळांची कामगिरी अतिशय कौतुकास्पद आहे. सातारा जिल्ह्यातील खटाव तालुक्यातील विखळे, खंडाळा तालुक्यातील शिरवळ, कोरेगाव तालुक्यातील ल्हासुर्णे, पाटण तालुक्यातील तारळे(मुळी), वाई तालुक्यातील निकमवाडी, जावळी तालुक्यातील ओझरे या जिल्हा परिषद शाळांनी अतिशय चमकदार शैक्षणिक प्रगती केली आहे. मात्र सातारा तालुक्यातील अपशिंगे (मिलीटरी) जिल्हा परिषद शाळेने मात्र गुणवत्तापूर्ण शिक्षणाबरोबर खेळ आणि स्पर्धा परीक्षेतही धवल यश संपादन केले आहे. वर उल्लेख केलेल्या सर्व शाळाही प्रगत शाळा, डिजीटल शाळा आयएसओ मानांकन प्राप्त आहेत.

.
महाबळेश्वरची ओळख थंड हवेच ठिकाण म्हणून १८ व्या शतकापासून झाली... देशातील सर्वाधिक पर्जन्यमान असलेल्या क्षेत्रामध्ये हे दुसऱ्या क्रमांकाचे सह्याद्रीच्या डोंगर रांगातील गिरीवन शहर .... या शहरापासून जवळच असलेल पाचगणी हेही असच सुंदर आणि टुमदार शहर ... अशा या दोन जगप्रसिद्ध शहराच्या मध्ये भिलार हे गाव वसलेल आहे. या गावाची गेल्या काही वर्षापासून स्ट्रॉबेरी पिकविणारे गाव म्हणून ओळख झालेली आहे. इथल्या प्रत्येक शेतकऱ्यांच्या शेतात हिवाळ्यात हे श्रीमंत पिक घेतल जात... दिवसेंदिवस या भागात देशभरातून आणि जगभरातून पर्यटकांचा ओढा वाढतो आहे. त्या पर्यटकांना महाराष्ट्र कळावा म्हणून महाराष्ट्र शासनाने या वर्षी पासून या गावाला पुस्तकाच गाव म्हणून नवी ओळख दिली. ती ओळख खुप गडद झाली असून हजारो पर्यटक या गावाकडे आकर्षित होत आहेत. नेमके हे पुस्तकाचे गाव ही काय संकल्पना हे समजावून घेण्यासाठी या गावाची प्रत्यक्ष भेट घेवून साधलेला हा संवाद ...... !!


Careers

Advertise with us

Privacy policy
Copyright     TODAY MEDIA NETWORK ,  All rights reserved.